لاہور۔28مئی(اے پی پی)وزیراعظم شہباز شریف ہدایت کیتی اے جو پاکستان اچ سرمایہ کاری کرݨ آلیاں چینی کمپنیاں دے مسلیاں کوں ترجیحی حل کیتا ونڄے، پاک چائنہ مشترکہ سرمایہ کاری دے منصوبیاں کوں تیکھے فعال کرݨ کیتے ہرممکن سہولت ݙتی ونڄے، انہاں کمپنیاں دے ملازمین کیتے سکیورٹی ٻئی تکڑی کیتی ویسی۔ اے ڳالھ انہاں چینی کمپنیاں دی سرمایہ کاری بارے جائزہ اجلاس دی صدارت کریندے آکھی۔ اجلاس اچ وفاقی وزیر برائے منصوبہ بندی و ترقی احسن اقبال، وفاقی وزیر پاور ڈویژن خرم دستگیر، وفاقی وزیر برائے سرمایہ کاری بورڈ چوہدری سالک حسین، وزیراعظم دے معاون خصوصی طارق فاطمی، سیکرٹری برائے داخلہ، خزانہ، خارجہ، سیکرٹری سرمایہ کاری بورڈ، پٹرولیم، پاور، آئی ٹی، ریلوے اتے ٻعے حکام شرکت کیتی۔ وفاقی وزیر احسن اقبال پاک چین کثیرالجہتی تعلقات و سرمایہ کاری دے مواقع تے بریفنگ ݙتی۔
