اسلام آباد۔9جون (اے پی پی) آندے مالی سال 2023-24ء اچ وزیراعظم یوتھ پروگرام دے تحت سوکھے قرضے ݙیوݨ کیتے 10 ارب روپے ، یوتھ سکلز پروگرام کیتے 5 ارب روپے رکھیے ڳن۔ جمعے کوں بجٹ تقریر اچ وزیر خزانہ اسحاق ڈار آکھیا جو اساݙے ملک دے نینگر حکومت دی خاص توجہ منڳندن کیونجو اڄ دے نینگر ایں ملک دے روشن مستقبل دے ضامن ہن۔ او قومی ترقی اتے خوشحالی اچ ٻہوں اہم کردار نبھا سڳدن۔ ایں کیتے تجویز اے جو آندے ترائے سالیں تئیں کہیں نینگر تے مشتمل اے او پی ولوں شروع کیتے ڳے کاروبار پاروں تھیوݨ آلی آمدݨ تے ٹیکس دی شرح پنجاہ فیصد تئیں ڳھٹ کیتی ونڄے۔ اے رعایت انفرادی یا اے او پی دی صورت اچ 20 لکھ روپے تئیں اتے کمپنی دی صورت اچ 50 لکھ روپے تئیں ہوسی۔ ایں سہولت توں فائدہ چاوݨ کیتے ضروری اے جو کاروبار دی مال دی عمر 30 سال تئیں ہووے اتے اے کاروبار یک جولائی 2023 یا اوندے بعد شروع کیتا ونڄے۔ وزیراعظم یوتھ پروگرام دے ذریعے چھوٹے قرضیاں ڳھنݨ کیتے اپݨا کاروبار شروع کرݨ کیتے رعایتی ریٹ تے قرضے ݙیوݨ کیتے 10ارب روپے رکھیے ڳن۔ وزیراعظم یوتھ سکلز پروگرام دے تحت نینگراں کوں خصوصی تربیت ݙیوݨ کیتے پنج ارب روپے رکھیے ڳن۔
