لاہور۔13اگست (اے پی پی) پی ڈی ایم اے پنجاب دا پورے پنجاب اچ مون سون بارشاں بارے الرٹ جاری، نواں سپیل 14 اگست دی شام توں شروع تھیسی۔ پی ڈی ایم اے دے ترجمان موجب 14 توں 18اگست تئیں پنجاب دے کئی ضلعیاں اچ بارشاں دی توقع اے، 15 توں 18 اگست وچال جنوبی پنجاب دے کئی ضلعیاں اچ اندھاری اتے ڳاڄ کھمݨ نال مینہ وسݨ دا امکان اے۔ ایں وچال لاہور ، گوجرانوالہ، راولپنڈی ،سرگودھا، ملتان، ڈیرہ غازی خان، بہاولپور ، فیصل آباد، ساہیوال اتے گجرات ڈویژنز اچ زور دا مینہ وس سڳدے۔ ڈی جی پی ڈی ایم اے آکھیا جو وزیر اعلیٰ دی ہدایات تے محکمے الرٹ رہن، اربن فلڈنگ دے ڈر پاروں کمشنرز، ڈی سیز ،واسا، محکمہ آبپاشی، ریسکیو، سول ڈیفنس اتے ٻئے محکمے پیشگی انتظامات کرن۔ ڈی جی پی ڈی ایم اے پنجاب عرفان علی کاٹھیا آکھیا جو پی ڈی ایم اے کنٹرول روم اچ چووی گھنٹے صورتحال دی مانیٹرنگ تھیندی پئی اے۔ کہیں وی ہنگامی صورتحال اچ شہری ادارے دی ہیلپ لائن 1129 تے کال کرن۔
