اسلام آباد۔17ستمبر (اے پی پی)بھارت انتہاپسند ہندوتوا دے ایجنڈے اتے مذہبی عدم برداشت دی پالیسی تے ٹردے ہوئے مقبوضہ کشمیر اچ اسلامی سکالرز دیاں گرفتاریاں شروع کرݙتن، اقوام متحدہ دی جنرل اسمبلی دے نیویارک اچ تھیو ݨ آلے اجلاس توں کجھ ہی ݙینھ پہلے جنیوا اچ انسانی حقوق کونسل دے جاری اجلاس ویلھے بھارت دے غیر قانونی زیر قبضہ جموں و کشمیر اچ علمائے کرام دی گرفتاری مذہبی مقامات تے قبضے دی بھارتی مہم دی شروعات اے۔ آزادی پسند قائدین دے بعد کشمیریاں دی تکڑی کو دباوݨ کیتے مہاندرے کشمیری مذہبی رہنماواں دی پکڑ دھکڑ شروع کر ڈتی اے جیڑھا انتہاپسند ہندوتوا ایجنڈے تے عمل دا حصہ اے۔ بھارتی قابض حکام ایں سانگے مولانا عبدالرشید داؤدی، مولانا مشتاق احمد ویری، فہیم محمد رمضان اتے عبدالمجید ڈار المدنی سودھا کئی اسلامی سکالراں کوں کالے قانون پبلک سیفٹی ایکٹ ہیٹھ نپ گھدے تے بدنام زمانہ کوٹ بلوال جیل جموں ݙھک ڈتے۔ انہاں گرفتاریاں تے کل جماعتی حریت کانفرنس دی آزاد کشمیر شاخ سخت ردعمل ڈیندے آکھیے جو مقبوضہ کشمیر اچ آزادی اظہار رائے تے پابندی دے نال نال آزادی پسند کارکناں اتے صحافیاں تے پبلک سیفٹی ایکٹ دی تلوار چلائی ویندی پئی اے تاں جو کشمیریاں کوں جدوجہد آزادی دے مطالبے تو پچھو ہٹایا ونڄ سڳے۔ مذہبی ڄاھیں، سیاسی کارکناں تے حملے، انہاں کوں ہراساں کرݨ دے منصوبے کامیاب نا تھیوݨ ݙتے ویسن۔ سیاسی تجزیہ کاراں موجب ایندے نال پورے مقبوضہ کشمیر اچ احتجاج اتے وݙے پیمانے تے بھارت مخالف فضا پیدا تھی سڳدی اے۔ کشمیری رہنماء سید مشتاق گیلانی ”اے پی پی” کوں ݙسائے جو مذہبی رہنماواں کوں گرفتار کرݨ کشمیریاں کوں انہاں توں انڄھ رکھ ݨ دی کوشش اے۔ انہاں سکالرز دی سݨیڄ اتے منیج ہے، ایں سانگے انہاں دے پیروکاراں اچ کوئی وی چنتا عوام کوں بھارت دے خلاف کھڑا کر سڳدے۔ کشمیری قیادت ہر ویلھے چتائے جو بھارتیہ جنتا پارٹی (بی جے پی) مقبوضہ جموں و کشمیر دی مسلم سنڄا ݨ مکاو ݨ اچ ردھی ہوئی اے جیکر ایں مہم کوں نا ݙکیا گیا تاں ایندے وݙے منفی اثرات پوسن۔ کل جماعتی حریت کانفرنس وائس چیئرمین شبیر احمد شاہ بدنام زمانہ تہاڑ جیل توں سنیہے اچ اینڄھے اقدام کوں مسلماناں دے مذہبی معاملات اچ کھلی مداخلت قرار ڈیندے آکھیا جو بھارت دی ہندو انتہا پسند تنظیم آر ایس ایس دے نظریئے نال متاثر فاشسٹ نریندر مودی دی زیر قیادت بھارتی حکومت کشمیریاں توں ہر حق کھسݨ دے بعد ہݨ وقف بورڈ دی زمین جائیداد تے قبضہ کریندی پئی اے، ایں سانڳے سری نگر دے مشہور عید گاہ قبرستان تے وی قبضے دا منصوبہ اے، بھارتی حکام دی اکھ مختلف خانقاہواں تے وی ہے۔ کل جماعتی حریت کانفرنس دی آزاد کشمیر شاخ اینجھے اقدامات دی مذمت کیتی اے۔ کانفرنس دے جنرل سیکرٹری شیخ المتین آکھیے جو اے کشمیری مسلماناں دے مذہبی معاملات اچ کھلی مداخلت اے، اے گالھ افسوسناک اے جو بھارت مقبوضہ کشمیر اچ مذہبی سکالرز دی گرفتاریاں اتے نویں پود کوں مذھب توں بد راہ کر ݨ اچ وی ردھا ہوئے۔ اپسالا یونیورسٹی دے پروفیسر اشوک سوین آکھیے جو مقبوضہ کشمیر اچ اے مسلم کش اقدامات حیران کن ہین، کوئی وی نی ڈسا سڳدا جو ایندا مقصد کیا اے؟ اینجھے اقدامات عوام تے اثر انداز تھیوݨ یا انسانی حقوق دی سنگین خلاف ورزیاں کوں بے نقاب کریندے پن۔ اینجھے سارے کماں دا یجنڈا کشمیر دی مسلم اکثریت کوں اقلیت اچ وٹاو ݨ اے۔ اینجھے حقائق دے باوجود عالمی برادری بالخصوص اقوام متحدہ دی چپ سوالیہ اے۔ اقوام متحدہ دی سلامتی کونسل دی منظور شدہ قرارداداں دے باوجود مسلہ کشمیر اج وی عالمی ادارے دے ایجنڈے تے حل طلب وڈا پراݨاں مسلہ اے ۔ پاکستان وی مطالبہ کیتے جو ڄق ایں معاملے تے غیر فعال تماشائی نہ ٻݨے۔ جنیوا اچ شروع تھیوݨ آلی 47 رکنی انسانی حقوق کونسل دے اجلاس اچ اقوام متحدہ اچ پاکستان دے مستقل نمائندے سفیر خلیل ہاشمی آکھیے جو انسانی حقوق کونسل دے کڄھ ارکان دی مجرمانہ خاموشی پاروں نام نہاد سب توں وݙی جمہوریت بھارت اچ انسانی حقوق دے جرائم چنتے دی حد تئیں ودھدے پن۔
