لندن۔14ستمبر(اے پی پی) حکومت پاکستان اتے برٹش کونسل دی سانجھ نال کامن ویلتھ یوتھ منسٹرزمیٹنگ دے مندوبین دے اعزاز اچ لندن اچ استقبالیہ ݙتا ڳئے، کامن ویلتھ دے رکن ملکاں توں یوتھ منسٹرز، اعلی عہدیداران اتے مختلف تنظیماں دے نمائندیں وݙی تعداد اچ شرکت کیتی ۔ دفتر خارجہ موجب استقبالیہ اچ برٹش پاکستانی کمیونٹی دی اہم شخصیات اتے نمایاں کاروباری لوک وی موجود ہن۔ وزیر خارجہ جلیل عباس جیلانی بطور چیئرپرسن استقبالیہ اچ شریک مندوبین کوں خوش آمدید آکھیے ۔ انہاں اجلاس دے بہترین انتظامات کرݨ تے کامن ویلتھ سیکرٹریٹ ،سیکرٹری جنرل پیٹریشیا سکاٹ لینڈ اتے انہاں دی ٹیم دی تعریف کیتی۔ وزیر خارجہ اجلاس دے کامیاب انعقاد اچ پاکستان نال تعاون تے برٹش کونسل اتے حکومت برطانیہ دا شکریہ ادا کیتے۔ انہاں آکھیے پاکستان تے برطانیہ چنڳے یار تے نیڑے شراکت دار ہن ، ساݙی یاری مشترکہ ورثے، اقدار اتے سانجھی خیر سگالی تے مبنی اے۔ وزیر خارجہ برطانیہ اچ موجود16 لکھ برٹش پاکستانیاں کوں ملک دا اثاثہ قرارݙتے تے پاک برطانیہ تعلقات ودھاوݨ اچ انہاں دے مثبت کردار دی تعریف کیتی ۔ سیکرٹری جنرل کامن ویلتھ پیٹریشیا سکاٹ لینڈ پاکستانی نینگراں دی قابلیت دی تعریف کیتی تے پاکستان دی ثقافتی خوبصورتی دی تعریف کیتی۔
