اسلام آباد۔1نومبر(اے پی پی) کابینہ دی اقتصادی رابطہ کمیٹی(ای سی سی) چھل رسپانس ایمرجنسی ہائوسنگ پراجیکٹ دے تحت بجٹ اچ مختص 30 ارب روپے دی سندھ حکومت کوں ݙیوݨ دے ضمن اچ تکنیکی ضمنی گرانٹ دی منظوری ݙے ݙتی ، اجلاس اچ ٻہوں ساریاں وزارتاں اتے ڈویژنز سانڳے تکنیکی ضمنی گرانٹس دی منظوری وی ݙتی ڳئی ۔ کابینہ دی اقتصادی رابطہ کمیٹی دااجلاس وفاقی وزیرخزانہ و محصولات سینیٹر محمد اور نگزیب دی زیر صدارت تھیا ۔ اجلاس اچ وزیر صنعت و پیداوار رانا تنویر حسین، وزیر توانائی سردار اویس احمد خان لغاری، وزیر منصوبہ بندی، ترقی و خصوصی اقدامات احسن اقبال، وزیر مملکت خزانہ علی پرویز ملک، گورنر سٹیٹ بینک، چیئرمین ایس ای سی پی اتے متعلقہ وزارتاں تے ڈویژنز دے سیکرٹریز اتے سینئر افسراں شرکت کیتی ۔اجلاس اچ وزارت قومی غذائی تحفظ و تحقیق دی طرفوں غذائی سال 2024-25 سانڳے پاسکو دے مقامی اتے درآمد شدہ کݨک دے ذخیرے کوں کݨک دی کمی دا شکار ایجنسیاں /علاقیں اچ مختص کرݨ دی تجویز تے غور تھئے ۔ اجلاس اچ معاملے تے تفصیلی بحث کیتی ڳئی تے فیصلہ کیتا ڳئے جو پاسکو دے ذخیرے توں مقامی اتے درآمد شدہ کݨک دی ای سی سی دے یکم فروری 2024 دے فیصلے دی بنیاد تے مختص کیتی ویسی تے جݙاں تئیں درآمد شدہ کݨک دا سٹاک مکمل طور تے مک نہ ونڄے ونڈا دا عمل جاری رہسی۔ ای سی سی متعلقہ ایجنسیاں /علاقیں کوں ݙتی ونجݨ آلی کݨک کوں پہلے معیار اتے انسانی استعمال دے قابل ہووݨ سانڳے جانچݨ دی ہدایت وی کیتی ۔اجلاس اچ وزارت داخلہ دی طرفوں 252.711 ملین روپے دی تکنیکی ضمنی گرانٹ دی تجویز تے غور کیتا ڳئے ایندی منظوری ݙتی ڳئی ، اے فنڈز وزارت ہائوسنگ اینڈ ورکس دی طرفوں سرینڈر کیتے ہن جو وزیراعظم آفس (پبلک)، وزیراعظم آفس انٹرنل تے وزیراعظم سٹاف کالونی اچ شہری سہولتاں دی بلا تعطل ݙیوݨ کوں یقینی بݨاوݨ سانڳے استعمال کیتے ویسن ۔اجلاس اچ ݙو وی وی آئی پی طیاریں دے انجݨ دی اوورہالنگ سانڳے 1.8 ارب روپے دی تکنیکی ضمنی گرانٹ دی منظوری دے حوالے نال وزارت دفاع دی سمری دی منظوری ݙتی ڳئی ، اے طیارے صدر مملکت اتے وزیر اعظم پاکستان دے سرکاری فرائض سانڳے استعمال تھیندن ۔اجلاس اچ وزارت داخلہ دی طرفوں ڈائریکٹر جنرل امیگریشن اینڈ پاسپورٹس سانڳے ݙو ای-پاسپورٹ پرسنلائزیشن سسٹمزتے چھی ڈیسک ٹاپ پرسنلائزیشن مشیناں دی خریداری دے حوالے نال 2.939 ارب روپے دی تکنیکی ضمنی گرانٹ دی سمری دی منظوری ݙتی ڳئی جیں دا مقصد مفاد عامہ سانڳے ڈائریکٹوریٹ دے سرکاری کماں دا سلسلہ بلاتعطل جاری رکھݨ اے اجلاس اچ وزارت منصوبہ بندی، ترقی و خصوصی اقدامات دی طرفوں وزارت خزانہ دے ترقیاتی فنڈ دے اجراء دے طریقہ کارموجب وزارت منصوبہ بندی دی منطوری نال چھل رسپانس ایمرجنسی ہائوسنگ پروجیکٹ” دے تحت سندھ حکومت کوں بجٹ اچ مختص 30 ارب روپے ݙیوݨ دی ضمناچ تکنیکی ضمنی گرانٹ دی سمری دی منظوری ݙتی ڳئی ۔ ای سی سی دے اجلاس اچ قومی احتساب بیورو (نیب) دی طرفوں آئین دے آرٹیکل 84 دے تحت نیب کوں ”ریکوری اینڈ ریوارڈ رولز 2002” موجب خرچے پورے کرݨ سانڳے مختص 376 ملین روپے دی تکنیکی ضمنی گرانٹ دی سمری دی منظوری بوی ݙتی ڳئی ۔ اجلاس اچ وزارت تجارت دی طرفوں چین اچ تجارتی تے سرمایہ کاری دے مشنز کوں معاونت ݙیوݨ سانڳے 226.720 ملین روپے دی تکنیکی ضمنی گرانٹ دی منظوری ݙتی ڳئی
