اسلام آباد۔10جولائی(اے پی پی) وزیراعظم محمد شہبازشریف محرم الحرام اچ امن و امان سانڳے صوبیں نال رابطہ برقراررکھݨ دی ہدایت کریندے ہوئیں آکھیے سیکورٹی معاملات اچ تعاون نال قومی اتحاد تے یکجہتی کوں تقویت ملسی ، معاشی اہداف گھنݨ سانڳے شفافیت اتے خود احتسابی دی لوڑھ اے، معیشت دا پاسہ سدھا کرݨ سانڳے کوڑے فیصلے تے اصلاحات کرݨُیاں ہوسن ،ڈائون سائزنگ تےرائٹ سائزنگ دے کم اچ وسلائی تے دیر برداشت نہ کریسوں ، پی ڈبلیو ڈی کوں مخاوݨ توں انکار کہیں صورت قبول کائںی ،چین نال تعاون ودھواݨ تے تکھی پیشرفت یقینی بݨاوݨی ہوسی ۔ روس دے صدر نال ملاقات اچ تجارتی تے سرمایہ کاری رابطے دے ودھاوݨ تے ڳالھ مہاڑ تھئی ، ٹیوب ویلاں دی شمسی توانائی تے منتقلی پاروں قیمتی زرمبادلہ دی بچت تھیسی ،پورے ملک اچ تیل نال چلݨ آلے 10 لکھ ٹیوب ویلاں کوں شمسی توانائی تے منتقل کیتا ویسی ساریاں وزارتاں کوں کاکردگی چنڳی کرݨی ہوسی ۔ اے ڳالھ انہاں وفاقی کابینہ دے اجلاس اچ آکھی اے ۔ وزیراعظم آکھیے کل خیبرپختونخوا وزیرستان اچ شہادتاں تھئن ۔کراچی اچ سی ٹی ڈی دے ڈی ایس پی کوں وی شہید کیتا ڳئےانہاں دے اُچے درجات سانڳے دعا کریندوں تے شہدا دے گھر آلیں نال تعزیت کریندوں۔ وزیراعظم آکھیے محرم الحرام اچ وزارت داخلہ تے صوبیں تے ٻئے متعلقہ اداریں وچال تکڑا رابطہ ہووݨا چاہیدے ۔ صوبیں کوں وفاق دی طرفوں جیڑھا وی تعاون چاہیدےانہاں کوں وختی ݙتا ونڄے۔ ایویں آزاد کشمیر تے گلگت بلتستان دی حکومتاں نال وی نیڑے رابطہ رکھیا ونڄے۔ سکیورٹی معاملات اچ تعاون پاروں قومی یکجہتی تے اتحاد کوں طاقت ملسی۔ وزیراعظم آکھیے انہاں تاجکستان دا دورہ کیتے تے ول شنگھائی تعاون تنظیم دے سربراہ اجلاس اچ شرکت کیتی۔ مختلف ملکاں دے اڳواݨاں نال فیدہ مند ملاقاتاں تھئن ۔ روسی صدر پیوٹن نال تجارتی تے سرمایہ کاری رابطے ودھاوݨ سانڳٖ تفصیلی ڳالھ مہاڑ تھئی ایں حوالے نال عملدرآمد سانڳے وفاقی وزیر منصوبہ بندی احسن اقبال دی سربراہی اچ ھک کمیٹی بݨائی ڳئی اے ۔ دورہ چین دے بعد اہم شعبیں اچ مزید تعاون سانڳے بریفنگ ڳھدی اے۔ ساریاں وزارتاں کوں چین نال مختلف شعبیں اچ تعاون سانڳے چنڳی تیاری تے اقدامات کرݨے چاہیدن ۔ وزیر اعظم آکھیے اے ملک تے پاکستان دے وسائل دا معاملہ اے۔ اساں ملک کوں اڳوں گھن ونڄݨا اے ۔ چین نال تعاون ودھاوݨ تے تکھی پیشرفت یقینی بݨاوݨی ہوسی ۔ وزیراعظم آکھیے بلوچستان اچ 28ہزار ٹیوب ویلاں کوں شمسی توانائی تے منتقل کرݨ دا فیصلہ کیتے۔ وزارت خزانہ ، وزارت پاور ڈویژن تے وزارت قانون دے حکام اتے وزیراعلیٰ بلوچستان ایں سانڳے ٻہوں کم کیتے ۔ وزیر اعلیٰ بلوچستان دا مسئلے مکاوݨ سانڳے سنجیدگی دامظاہرہ قابل تعریف اے۔ٹیوب ویلاں سانڳے وفاق دی طرفوں ݙتے ونجݨ آلے 80 ارب روپے ضائع تھیندے پئے ہن اساں ھک وݙا مرحلہ طے کیتے ایں سانڳے وزارت خزانہ ،وزارت پاور ڈویژن تے بلوچستان دی حکومت تے خاص طور تے وزیراعلیٰ بلوچستان کوں خراج تحسین پیش کرینداں انہاں ایں معاملے کوں چنڳے طریقے نال اڳوں ودھاوݨ سانڳے کم کیتے وزیراعظم آکھیے ملک اچ 10لکھ ٹیوب ویل تیل تے چلدے پئن تے اساں سالانہ ساڈھے ترائے ارب ڈالر دا تیل درآمد کریندوں ،پورے ملک اچ تیل نال چلݨ آلے 10 لکھ ٹیوب ویلاں کوں شمسی توانائی تے منتقل کیتا ویسی ایں سانڳے ھک بزنس ماڈل بݨاوݨ تے صوبیں نال نیڑے رابطے دی لوڑھ اے۔ بلوچستان اچ 28 ہزار ٹیوب ویلاں دی شمسی توانائی تے منتقلی ھک اہم اقدام اے۔ وزیراعلیٰ بلوچستان اتے وفاق دے متعلقہ افسراں محنت نال کم کیتے۔ وزیراعظم آکھیے ٹیوب ویلاں دی شمسی توانائی تے منتقلی نال قیمتی زرمبادلہ دی بچت تھیسی تے کساناں کوں سستی بجلی مل ویسی ۔ بجلی دی ٹرانسمیشن لائناں کوں چنڳاں بݨاوݨ تے بجلی چوری تے قابو پاوݨ دی لوڑھ اے ۔ شمسی توانائی توں بݨݨ آلی سستی بجلی دا فیدہ زراعت اتے کاشتکار کوں تھیسی زرعی شعبہ تکھے ترقی کریسی ۔ وزیراعظم آکھیے پاکستان اچ معدنیات دے ٻہوں ذخیرے ہن جنہاں توں فیدہ چاوݨا ہوی ویلھا تکھے لنگھدا پئے ،معاشی چنڳائی سانڳے پکے اقدامات دی لوڑھ اے ۔وزیراعظم آکھیے ڈائون سائزنگ اتے رائٹ سائزنگ تے کم تھیندا پئے کہیں وزارت وی ایندے اچ وسلائی نی کیتی تے کہیں دیر کیتی تاں اینکوں برداشت نہ کیتا ویسی ،کہیں وزارت دے ذیلی ادارے دی جے کوئی افادیت دے حوالے نال کوئی جائز عذر اے تاں او انڄ ڳالھ اے لیکن اپݨے فیدے سانڳے کہیں محکم دے دفاع کوں قبول نہ کیتا ویسی ۔وزیراعظم شہباز شریف آکھیے پاکستان نیشنل شپنگ کارپوریشن کنے 10 توں 12 بحری جہاز ہن لیکن تنخواہیں 500 ارب روپے ہن تے5 ارب ڈالر ملک سالانہ بحری جہازاں دے کرائے دی مد اچ ݙیندے۔ کراچی بندر گاہ تے تھیوݨ آلی کرپشن روکݨ سانڳے اقدامات کرݨے ہوسن ، کراچی بندر گاہ اچ 1200 ارب روپے دی چوری تھیندی پئی اے، اے پیسہ تاں ترقیاتی منصوبیں داسو تے دیامر بھاشا ڈیم منصوبیں تے خرچ تھی سڳدے۔ کرپشن دا سد باب کرتے وسائل عوام دی بہبود تے خرچ کریسوں ۔ بنگلہ دیش تے ہندوستان کنے اساں توں کئی گنا ودھ بحری جہاز ہن۔ معاشی اہداف گھنݨ سانڳے شفافیت تے خود احتسابی دی لوڑھ اے۔وزیراعظم آکھیے ریئل سٹیٹ دے شعبے تے ٹیکساں توں 100 ارب روپے ملݨ دی توقع اے۔انہاں آکھیے اے نی تھی سڳدا جو صرف تنخواہ دار طبقے تے ٹیکس لاتا ونڄے تے ٻئے ایجھے شعبیں کوں چھوڑ ݙیسوں جیڑھے ٹیکس ݙیوݨ دی صلاحیت رکھیندن۔ اساکوں کوڑے فیصلے کرݨے پوسن تے ڈھانچہ جاتی اصلاحات کرݨیاں ہوسن توقع اے آئی ایم ایف دا ممکنہ پروگرام پاکستان دا چھیکڑی پروگرام ہوسی ،آئی ایم ایف توں نجات دا ہدف صرف ڳالھیں توں نہ ملسی ، آئی ایم ایف توں جند چھڑاوݨ سانڳے قربانی ݙیوݨ پاروں ممکن اے ۔ معیشت دا پاسہ سدھا کرݨ سانڳے کوڑے فیصلےتے اصلاحات کرݨیاں ہوسن ۔ کرپشن مکاوݨ تے موثر انتظامی اقدامات دے ذریعے ملکی وسائل ودھائے ویسن ۔غریب اتے نادار طبقے دی اوکھ دا چنڳی طرح پتہ اے، کرپشن مکاوݨ تے ٻئے موثر انتظامی اقدامات نال ملکی وسائل ودھاوئے ویسن ،غریب طبقے کوں ریلیف ݙیوݨ سانڳے وفاق ترقیاتی بجٹ توں 50 ارب دا انتظام کیتے،ترائے مہینے سانڳے بجلی صارفین کوں ریلیف ݙتا ویسی لیکن ایں عرصے اچ ودھیک مالی وسائل دا انتظام کرݨا ہوسی اساکوں ݙینھ رات ھک کرتے معاشمی اقدامات کوں نتیجہ خیز بݨاوݨاں اے۔ وزیراعظم آکھیے ملک اچ بجلی فاضل اے لیکن لوڈ شیڈنگ انھاں علاقیں اچ تھیندی پئی اے جتھاں بجلی چوری تھیندی اے خرچے گھٹاوݨ سانڳے ڈائون سائزنگ تےرائٹ سائزنگ دی خود نگرانی کریندا پیاں ، پی ڈبلیو ڈی دی بند کرݨ دے فیصلے تے عمل درآمد اچ دیر برداشت نہ کیتی ویسی ایں سانڳے ݙو ہفتے ݙتے ڳئے ہن او پورے تھی ڳئن اساں اینکوں پورا بند کرݨا اے ایں سانڳے متبادل سسٹم دا انتظام کر ڳھدے،پنجاب دے ماڈل تےعمل کیتا ویسی ۔ وزیراعظم آکھیے اساکوں کفایت شعاری اپناوݨی ہوسی قوم نتیجہ چاہندی اے، وزیر تجارت برآمدات کوں 60 ارب ڈالر تئیں گھن ونڄݨ سانڳے پلان تیار کرے،پاکستان دی ترقی تےخوشحالی سانڳے اساکوں معاشی چیلنجز تے قابو پیندے اڳوں ودھݨا اے، ساریاں وزارتاں کوں آپݨی کارکردگی مزید چنڳی کرݨی پوسی۔
