اسلام آباد۔9جولائی (اے پی پی) وزیراعظم محمد شہباز شریف آکھیا جو چیلنجز دے باوجود پاکستان افغان مہاجرین دی ٻہوں عزت اتے وقار نال میزبانی کیتی اے۔ عالمی برادری افغان مہاجرین دی اتنی وݙی تعداد دی میزبانی کرݨ تے پاکستان تے پووݨ آلے ٻوجھ کوں ڳھٹ کرݨ کیتے اجتماعی ذمہ واری ݙکھاوے۔ اے ڳالھیں انہاں منگل کوں اقوام متحدہ دے ہائی کمشنر برائے مہاجرین (یو این ایچ سی آر) فلیپو گرانڈی نال ڳالھ مہاڑ کریندیں ہوئیں آکھی جنہاں وزیراعظم نال ملاقات کیتی۔ ملاقات اچ وزیراعظم یو این ایچ سی آر نال پاکستان دی پراݨی سانجھے داری دا حوالہ ݙیندیں ہوئیں چار ݙھاکیاں توں ودھ عرصے توں افغان مہاجرین دی میزبانی اچ اقوام متحدہ ولوں پاکستان دی حمایت دی تعریف کیتی۔ وزیراعظم زور ݙتا جو عالمی برادری افغان مہاجرین دی اتنی وݙی تعداد دی میزبانی کرݨ تے پاکستان تے پووݨ آلے ٻوجھ کوں ڳھٹ کرݨ کیتے اجتماعی ذمہ واری ݙکھاوے۔ وزیراعظم آکھیا جو افغان مہاجرین دی محفوظ اتے باوقار وطن واپسی حکومت پاکستان دی پہلی ترجیح اے۔ وزیراعظم زور ݙتا جو افغان مہاجرین دی وطن واپسی دے مسئلے اچ عالمی برادری پاکستان کوں سماجی تے اقتصادی چیلنجز اتے سلامتی دے خطریاں کوں ݙکھے۔ اقوام متحدہ دے ہائی کمشنر گزریل کئی ڈھاکیاں توں لکھاں افغان مہاجرین دی میزبانی کرݨ تے حکومت پاکستان کوں مثالہ مزمان نوازی تے خراج تحسین پیش کیتا۔ انہاں یقین ݙوایا جو یو این ایچ سی آر افغان مہاجرین دی بنیادی ضروریات کوں پورا کرݨ کیتے پاکستان نال رَل تے کم کریندا رہسی۔ واضح راہوے جو اقوام متحدہ دے ہائی کمشنر 7 توں 9 جولائی 2024 تئیں پاکستان دا دورہ کریندے پئن۔
