اسلام آباد۔7دسمبر(اے پی پی):وفاقی وزیر اطلاعات و نشریات مریم اورنگزیب آکھیے جو مذہب تے سیاست چمکاوݨ ،شہدا دے خلاف غلیظ مہم چلاوݨ تے قومی مفاد ویچݨ آلا ہݨ کشمیر تے سیاست کریندا پئے ، وزیراعظم آزاد کشمیر عمران خان دے اکساوݨ تے منگلا ڈیم دی مرمت دے منصوبے دی تقریب اچ افسوسناک حرکت کیتی، عمران خان آپݨی ٻݙدی سیاست دی خاطر آزادکشمیر اتے پاکستان دی بہتری دے منصوبے دی تقریب کوں منفی رنگ ݙیوݨ دی گھٹیا تے قابل مذمت چال چلی، سائفر دے منٹس تبدیل کرتے قومی مفادات کوں ٹھیس پڄاوݨ آلے ”کاریگر “توں ٻئی توقع ہی کیا کیتی ونڄ سڳدی اے ؟ ٻدھ کوں عمران خان دے بیان تے ردعمل اچ وفاقی وزیر اطلاعات آکھیے جو توشہ خانہ لٹݨ تتے گھڑیاں ویچݨ آلا ہݨ کشمیر دے ناں تے آپݨی گندی تے بے شرم سیاست کریندا پئے، کشمیر فروش وزیراعظم شہبازشریف کوں نہ ݙساوے جو مسئلہ کشمیر تے کیا کرݨا اے ۔ انہاں آکھیے کشمیر تے ھک گھنٹہ اٹھ بۃہ کرݨ تے سڑکاں تے چوکاں تے ناں بدلݨ آلا قومی مفاد تے کھیݙ کھیݙدا پئے ۔ وفاقی وزیر اطلاعات آکھیے افسوس! وزیراعظم آزاد کشمیر آپݨے منصب دا خیال رکھیا تے نہ ہی مسئلہ کشمیر دی نزاکت دی پرواہ کیتی، ذاتی، جماعتی اتے سیاسی مفادات کیتے مسئلہ کشمیر کوں ایں بھونڈے انداز اچ استعمال کرݨ مناسب نہ ہئی ۔ انہاں کوں اے خیال کرݨا چاہیدا ہئی جو او آزاد ریاست جموں و کشمیر دے وزیر اعظم دے منصب تے فائز ہن۔وفاقی وزیر مریم اورنگزیب آکھیے جو وزیراعظم آزاد کشمیر ڄاݨ ٻڄھ تے وزیراعظم شہباز شریف دی تقریر دے دوران مداخلت کیتی، وزیراعظم شہباز شریف نرمی نال انہاں کوں اے آکھدے رہ ڳئے جو اساں ٻہہ تے ڳالھ کریسوں ، وزیراعظم شہباز شریف انہاں کوں اے وی آکھیا جو کوئی مسئلہ اے تاں او وزیراعظم آزادکشمیر نال رل تے اینکوں حل کریسن ۔ وفاقی وزیر اطلاعات آکھیے جو وزیراعظم شہباز شریف ہر عالمی فورم تے کشمیر تے کشمیریاں دے مفادات دی بھرپور ترجمانی کیتی اے ، اقوام متحدہ دی جنرل اسمبلی، شنگھائی تعاون تنظیم سودھے ہر عالمی علاقائی فورم تے مسئلہ کشمیر کوں پوری طاقت نال چاتے ۔ انہاں آکھیے کاش ! وزیراعظم آزاد کشمیر ایں جرأت دا اظہار اپݨے ”کشمیر فروش قائد“ دے سامݨے کریندے۔ کشمیر فروش دی نالائقی، نااہلی اتے سازش دی وجہ توں بھارت کوں 5 اگست 2019ءدا غیر قانونی قدم چاوݨ دی جرأت تھئی ، کشمیر فروش مودی دی الیکشن اچ کامیابی دیاں دعاواں کریندا رہیا ، کشمیر فروش آکھدا ہئی جو مودی دے ول منتخب تھیوݨ تے مسئلہ کشمیر حل تھی ویسی ۔ انہاں آکھیے جھیڑا جموں و کشمیر تے پورا پاکستان متحد اتے ھک آواز اے، ایں حساس معاملے کوں سیاسی و جماعتی تقسیم دی بھینٹ نہ چڑھاون، مہربانی ہوسی۔
