اسلام آباد، نیو یارک۔22ستمبر (اے پی پی) وزیر خارجہ مخدوم شاہ محمود قریشی افغان عوام کوں ممکنہ انسانی بحران دے خطرے توں بچاوݨ کیتے عالمی برادری ولوں انسانی تعاون ݙیوݨ یقینی ٻݨاوݨ تے زور ݙتا۔ دفتر خارجہ ولوں جاری پریس ریلیز دے مطابق وزیر خارجہ نیویارک اچ اقوام متحدہ جنرل اسمبلی دے76ویں اجلاس دے موقع تے آئرلینڈ دے وزیر خارجہ و دفاع سائمن کوونے نال ملاقات کیتی۔ ایں موقع تے ݙوہیں وزرائے خارجہ وچال ݙو پاسہ تعلقات، مختلف شعبیاں اچ ݙو پاسہ تعاون ودھاوݨ اتے افغانستان دی ابھردی ہوئی صورتحال تے ڳالھ مہاڑ کیتی۔ وزرائے خارجہ افغانستان دی اڄوکی صورتحال تے ڳالھ مہاڑ کریندیں ہوئیں ، افغان عوام کوں ممکنہ انسانی بحران دے خطرے توں بچاوݨ کیتے عالمی برادری ولوں انسانی تعاون کوں یقینی ٻݨاوݨ تے زور ڈتا۔ وزیرخارجہ آکھیا جو پاکستان آئرلینڈ نال ݙوپاسہ تعلقات کوں خصوصی اہمیت ݙیندے۔
