اسلام آباد۔28دسمبر (اے پی پی) وفاقی وزیر برائے توانائی سردار اویس احمد خان لغاری آکھیا جو فروری 2025 تئیں توانائی دے شعبیاں دے منصوبیاں تے عمل درآمد تھی ویسی،توانائی دے شعبے اچ اصلاحات تیزی نال تھیندی پئین۔ توانائی دے بحران نال نبڑݨ دے بعد عوام تئین فیدے پڄاوݨ اساݙی ذمہ واری اے۔ حکومت صنعتی شعبے کوں ترجیحی بنیاداں تے سہولت ݙیندی پئی اے۔ اے ڳالھیں انہاں چھݨ چھݨ کوں پریس کانفرنس توں خطاب کریندیں ہوئیں آکھی۔ انہاں آکھیاجو اساں عوام کوں جوابدہ ہیسے۔ سال 2024 اچ نو مہینے اچ اساݙی حکومت دی وزیر اعظم محمد شہباز شریف دی سربراہی اچ کارکردگی جواب دہ ہووݨ پاروں عوام دے سامھے رکھݨ چاہندوں۔ انہاں آکھیاجو اڄ توں چار سال پہلے بجلی دا شعبہ ساریاں توں ودھ مسئلیاں دا شکار ہئی۔ اساں کامیابی نال ایں مصیبت توں نکلیے اتے اساں عوام تئیں ایندے فیدے پڄیسوں۔ میݙی رائے دے مطابق انہاں نو مہینے اچ محمد شہباز شریف دی حکومت جیڑھی کامیابی ڳھدی اے پاکستان دی تاریخ اچ پاور سیکٹر دے ریفارمز بارے اینویں نی تھیا۔ الحمدللہ جون دے مہینے اچ جتھ پاکستان دی عوام کیتے اوسط بجلی دی قیمت 48 روپے 70 پیسے ہئی او ہݨ ایں عرصے اچ 44 روپے اتے چار پیسے فی یونٹ تئیں پڄ ڳئی اے۔ جتھ انڈسٹری کوں 58 روپے 50 پیسے دا اوسط یونٹ پوندا ہئی اڄ 47 روپے 17 پیسے دا تھی ڳئے۔ وفاقی وزیر آکھیا جو اساں آپݨے ملک دے ایں ترسیلی نطام جد بدقسمتی نال بد انتظامی ،نا اہلیت ، کرپشن پاروں نویں پراجیکٹس نہ ڳھن امدا پئیا ہئی، ایں ترسیلی نظام کوں وزیراعظم پاور ڈویژن دی تجویز تے ریسٹرکچرنگ دی منظوری ݙتی جئیں دے تحت این ٹی ڈی سی جو مختلف کمپنیاں کوں ہولڈ کریندی اے اوندی ڄاہ ہک ورلڈ کلاس کمپنی وجود اچ آئی۔ مارچ 2025 اچ کمپنی انڈیپینڈنٹ سسٹم مارکیٹ آپریٹر دے تحت بجلی دی خرید و فروخت دی ذمہ واری ہوسی اتے حکومت ایندی ذمہ وار نہ ہوسی۔ وزیر اعظم محمد شہباز شریف دی قیادت اچ بجلی دے ترسیلی نظام دے مسئلے کوں وی حل کر ڳھدا ڳئے۔ رحیم یار خان مٹیاری لائن ،غازی بروتھا فیصل آباد دی لائن نہ ٻݨدی پئی ہئی، ملک دے جنوب اچ بجلی دا ترسیلی نظام جئیں سستی بجلی کوں اتے ڳھن تے ونجݨا ہئی او نی تھی سڳدا ہئی، اساں انہاں چاریں وݙے منصوبیاں اچوں ترائے منصوبے کوں اکنامک افیئرز ڈویژن ، اپنے ڈویلپمنٹ پارٹنرز نال فنڈنگ کوں یقینی ٻݨائے اتے رحیم یار خان مٹیاری پراجیکٹ پبلک پرائیویٹ پارٹنرشپ نال شروع تھی ڳئے اتے اگلے ݙو ݙھائی سالیں اچ پورا تھی ویسی۔
