اسلام آباد۔26دسمبر(اے پی پی):وزیراعظم شہباز شریف نینگراں دے ٹیلنٹ کوں سامݨے گھن آوݨ کیتے کمیٹی دے قیام دا اعلان کریندے ہوئیں آکھیے جو اے کمیٹی پورے ملکا چ نینگراں دے ٹیلنٹ کوں سامݨے گھن آوݨ دے نال نال ثقافت ودھاوݨ اچ وی چنڳاں کردار ادا کریسی، نوجوان نسل اچ پاکستان کوں قائد اتے علامہ اقبال دا پاکستان بݨاوݨ دا جذبہ اتے ولولہ موجود اے ، پاکستان ترقی کرݨی اتے اڳوں ودھݨا اے تاں ایندی کنجی ساݙی نوجوان نسل دے ہتھ وچ اے ، ایں کیتے حکومت پاکستان سارے وسائل نینگراں دے قدماں اچ رکھݨ کیتے تیار اے ۔ نینگراں شارٹ فلمز دے ذریعے پاکستان دا مثبت تشخص دنیا دے سامݨے گھن آئے ۔ اونیشنل ایمچور شارٹ فلم فیسٹیول 2022دی ایوارڈ تقریب توں خطاب کریندے پئے ہن ۔ وفاقی وزیر اطلاعات و نشریات مریم اورنگزیب ، اراکین کابینہ ، پارلیمنٹرین ، سیکرٹری اطلاعات و نشریات شاہیرہ شاہد سودھے شرکا دی وݙی تعداد موجود ہئی ۔ وزیراعظم شہباز شریف آکھیے نیشنل امیچور فلم فیسٹیول اچ بہترین فلماں تیار کرتے نینگراں ساݙے سر فخر نال اچے کرݙتن ۔ نینگراں ݙینھ رات محنت کرتے ایں معاشرے اچ خود اپݨا مقام بݨائے ، ایوارڈ جتݨ آلیں اڄ دی تقریب کوں چار چندر لاݙتن ، کامیاب تھیوݨ آلیں حقیقی معنے اچ آپݨی صلاحیتاں دا لوہا منوائے ۔ انہاں سلطان احمد بند سلائم دی پاکستان آمد دا خیر مقدم کریندے ہوئیں آکھیے انہاں دا تعلق ساݙے دوست ملک توں اے ،انہاں کوں پاکستان آوݨ تے خوش آمدید آکھدوں ۔ وزیراعظم شہباز شریف آکھیے اڄ نالج دا دور اے ، اللہ تعالی دے فضل و کرم نال ساݙی نوجوان نسل اچ پاکستان کوں قائد اتے علامہ اقبال دا پاکستان بݨاوݨ دا جذبہ تے ولولہ اے ۔ انہاں آکھیے نوجوان ٻالڑیاں تے ٻالاں شارٹ فلم دے ذریعے پاکستان دا حسن ، قدیم ورثہ ،دریا ،سمندر تے جھیلاں دی سوہݨی عکاسی کیتی تے دنیا کوں ݙکھائے ۔ انہاں آکھیے 60ء70ء80 دے ݙھاکے اچ ساݙے ڈرامیں دی آپݨی اہمیت ہئی ، فلم انڈسٹری اتے کلچر اچ بے شمار کم تھئے ، او وی ویلھا آیا جݙاں فلماں بند تھیاں تے سینما بند تھی ڳئے ۔ انہاں آکھیے اڄ ھک کمیٹی قائم کرݨ دا اعلان کرینداں جیڑھی پورے پاکستان توں ٹیلنٹ کوں سامݨے گھن آسی تے کلچر کوں ودھارا ݙیوݨ کیتے کم کریسی ۔ وزیراعظم شہباز شریف نے وفاقی وزیر اطلاعات و نشریات مریم اورنگزیب کوں الویندے ہوئیں آکھیے جو فلم فیسٹیول اچ چنڳی پوزیشن گھنݨ آلے 15 نینگراں کوں سکالر شپ تے بھجواوݨ دی ڳالھ کیتی ڳئی ، اے تعداد ٻہوں گھٹ اے ، ایندی تعداد 50 کیتی ونڄے جیں اچ 25 ٻال تے 25 ٻالڑیاں ہوون ۔
