اسلام آباد۔ 7 مئی (اے پی پی) وفاقی وزیر اطلاعات و نشریات عطاء اللہ تارڑ آکھیے جو بھارت پاکستان دے اندر حملہ کرتے بزدلی دا مظاہرہ کیتے، پاکستان دی موثر اتے فیصلہ کن جوابی کارروائی دے بعد بھارت لائن آف کنٹرول تے چٹا جھنڈا لہرا تے اپݨی شکست من ڳھدی اے، بھارت تحقیقات توں ہمیشہ بھڄدا رہیے، اڄ وی حملہ کرݨ آئے تاں ول بھڄ ڳئے۔ بدھ کوں اِتھاں میڈیا نال ڳالھ مہاڑ کریندے وفاقی وزیر اطلاعات آکھیے جو جھمبر رات دے اندھارے اچ نہتے شہریاں، تریمتاں ، ٻالاں اتے مسیتاں کوں نشانہ بݨائت جیڑھا جو جنگی اخلاقیات دی کھلی خلاف ورزی اے۔ انہاں آکھیے جو پاکستان بھارتی جارحیت دا کئی ڳنا ودھ جواب ݙتا، دُشمن دے پنج جنگی طیارے اتے ھک ݙرون مار ݙِتے جݙاں جو لائن آف کنٹرول تے ٻہوں بھارتی پوسٹاں تباہ کر ݙِتیاں ڳئن ۔ عطاء اللہ تارڑ آکھیے جو اج بھارتی میڈیا وی اپݨی شکست منیندے ݙٹھے ہوئے طیاریں دا ملبہ ݙکھائے، اساݙیاں فوجاں دُشمن دیاں حداں دے اندر کارروائی کیتی۔ وفاقی وزیر اطلاعات آکھیے جو اساݙیاں بہادر فوجاں دلیری نال صورتحال دا مقابلہ کیتے، پوری پاکستانی قوم اج اپݨی بہادر فوجاں دے نال کهڑی اے۔ عطاء اللہ تارڑ آکھیے جو وزیراعظم اڄ قومی سلامتی کمیٹی دا اجلاس سݙیے جئیں اچ موجودہ صورتحال دا غور نال جائزہ ڳھدا ویسی۔ انہاں آکھیے جو پاکستان پہلگام واقعے دی تحقیقات دا آکھیے پر بھارت اوں توں وی بھڄ ڳئے ، اڄ حملے دے بعد وی ایویں بھڄ ڳئے، پاکستان اڄ بھارت کں مُنہ بھن جواب ݙتے تے بھارت چٹا جھنڈا لہراوݨ تے مجبور تھی ڳئے۔ وفاقی وزیر اطلاعات ھک سوال دے جواب اچ آکھیے جو بھارتی میڈیا خود منیندا پئے جو انہاں دے طیارے مار ݙِتے ڳئن، مزید ضیان دی تفصیلات وختی سامݨے آسن۔ انہاں آکھیے جو پاکستان دیاں مسلح افواج نہ صرف جنگی اہداف کوں نشانہ بݨائے، کہیں شہری کوں نشانہ نی بݨایا ڳیا کیونجو اساݙیاں مسلح افواج پیشہ ورانہ اصولاں دی مکمل پابند ہن۔ عطاء اللہ تارڑ آکھیے جو جنگ دے وی آداب ہوندن، دشمن وی ہووے تاں کم ظرفی نی ہووݨی چاہیدی جو شہریاں کوں نشانہ بݨایا ونڄے۔ انہاں ݙسایا جو اج صحافیاں دے ھک وفد کوں مریدکے اتے بہاولپور ڳھن وںڄݨ دا منصوبہ ہئی تاں جو عالمی میڈیا کوں ݙکھایا ونڄ سڳے جو انھاں علاقیاں اچ کہیں قسم دے دہشت گرد کیمپ موجود کائنی۔ انہاں واضح کیتے جو پاکستان دہشت گردی دے خلاف جنگ اچ فرنٹ لائن اسٹیٹ اے جیڑھی 90 ہزار توں ودھ قیمتی جاناں دی قربانی ݙتی اے۔ بھارت خود دہشت گردی اچ ملوث اے، او امریکہ، آسٹریلیا اتے کینیڈا اچ سکھاں دے قتل اچ ملوث پاٹا ڳئے جݙاں جو کلبھوشن یادیو جیڑھے دہشت گرد کوں پاکستان اچ گرفتار کیتا ڳیا جیڑھا تخریبی سرگرمیاں اچ ملوث ہئی۔ انہاں آکھیے جو بھارت کنے نہ دلیل اے نہ ثبوت اتے پہلگام واقعے اچ ایف آئی آر واقعے دے صرف ݙاہ منٹ بعد درج کیتی ڳئی جݙاں جو پولیس ݙڈھ گھنٹے بعد وقوعہ تے پڄی۔ عطاء اللہ تارڑ آکھیے جو پوری قوم مسلح افواج دے رلے کهڑی اے، اساں عالمی میڈیا دے سامݨے پاکستان دا موقف واضح طور تے رکھئے جݙاں جو بھارت دا بیانیہ کتھائیں نظر نی آیا۔ انہاں آکھیے جو بھارت بدنیتی نال آیا ہئی پر جݙاں مقابلہ تھئے تاں ݙر تے بھڄ ڳئے تے اڄ او چٹا جھنڈا لہراوݨ تے مجبور اے۔
.jpg)
